Strong hold到何時？十一直接放機俾自遊行？

甩身升價好時機？ 10.1 攻「搶 iPhone 6」自遊行

早前 iPhone 6 回收價又大跌，唔少朋友都叫大家 Hold 貨，話有望 10.1 黃金周升返！不過，就響 10.1 前夕嘅今日，出現炒家噩耗，受內地行貨 10.17 開售嘅消息影響，今晚 iPhone 回收價又跌返落貼近之前低位，到底有貨點算好？

Lo 哥：黃金周走貨好時機

先達「名人」 G-World Mobile 店主 Lo 哥就對 ezone.hk 記者說：「10.1 黃金周係傳統嘅零售旺季，的確會有唔少自由行遊客來港消費，而內地未開售嘅 iPhone 6 / 6 Plus，預計會成為熱賣產品，來港買 iPhone 嘅自由行遊客，相信會比去年升 1 倍。」

Lo 哥說：「前幾日各型號嘅回收價，已出現明顯升幅，較先前低位回升數百元。原價 $5,588 嘅 iPhone 6 16GB 金色收近 $6,800；iPhone 6 Plus 128GB 金色亦持續勇猛，原價 $8,088 以接近 $11,000 回收，賺 $2,912。不過，受今日蘋果正式公布，於 10.17 在內地開售 iPhone 6 嘅消息影響，細機（即 4.7 吋 iPhone 6）回收價普遍跌近 $500，但對大機 (iPhone Plus) 則未有太大影響。」

專業炒家小炒王亦向 ezone.hk 記者說，Apple 近日派貨不多，Online Store 貨出得七七八八，而 iReserve 更連日缺貨，10 月 17 日之前內地始終有需求，覺得今日晚市明顯係聯手壓價，未能反映市場現貨價格 。

Lo 哥估今年黃金周來港買 iPhone 嘅遊客，會比去年上升 1 倍。

內地遊客來港高收？

Hold 貨嘅朋友，你最期待嘅畫面出現了？近日有 Facebook 群組中，有內地網友表示會於 10.1 來港收貨，香港行貨各型號回收價，會比先達價高 $850，而澳洲水貨亦會高 $600，並稱到時會穿着指定服飾以作記認，一眾巴絲打紛紛 LM (留名)！但咪住先，佢講明「先黎先得收滿走人」，無話會收幾多部喎！ezone.hk 記者問 Lo 哥點睇，Lo 哥慨嘆：「唉，都唔出奇架，百老匯門口無人理，而家網上一個人話咁，可能到時有幾十人衝落黎收都唔出奇，總知個市場真係好亂啦！」

此外，小炒王又指，若大家想放得靚價一點，可考慮藉黃金周到 Apple Store 門外，或先達附近，向自由行遊客兜售 iPhone 6 / 6 Plus，小炒王有朋友日前成功以 $11,000 售出已開封的 iPhone 6 Plus 128GB 予自由行遊客，而當時先達只收 $9,500，獲利更豐厚。不過，街頭無牌擺賣係違法行為，ezone.hk 絕不鼓吹。

有內地網民揚言，10.1 來港高收 iPhone，信不信由你！

Source: ezone.hk