昨日有傳中國行貨 iPhone 6 / iPhone 6 Plus 將於 10 月 10 日正式開售，「國行」有機會上市，是否代表炒風已近水尾？此外，台灣行貨昨天正式開賣，而且係玩 Apple Online Store 即時訂購，出貨時間更只是 7 – 10 天，對香港貨源隨時有衝擊也說不定。如果真係水尾，對炒家而言，可能就要把握每分每秒入貨。依家購買 iPhone 都要玩 iReserve 即日取機，想增加 iReserve「中獎」機會，以下依 iReserve 登記步驟，醒你幾招貼士。
第一步：預知 iReserve 開庫時間
想玩 iReserve，首要知道佢幾點開門。除每天早上 8 時幾可肯定會開門之外，其餘時間都係玩「打游擊」。想第一時間知 iReserve 幾時開，你可以下載一款叫《iReserve 各專門店存貨表》的實時監察程式，當 iReserve 開賣或有貨，就會發出提示。如果要流動監察，仲可以用同名 Android App。有記者試過監察程式，發現真係可以「準時」提醒 iReserve 開門，但亦有記者發現收到提示之後，貨源已賣曬！
第二步：直入 iReserve 網址
看似簡單卻是重要的一步，想直入 iReserve 網址，下面呢條 link 就是了：
https://reserve-hk.apple.com/HK/en_HK/reserve/iPhone
https://reserve-hk.apple.com/HK/en_HK/reserve/iPhone/availability （睇貨源可用這條）
第三步：Apple ID 申請定
玩 iReserve 第一項要填就係 Apple ID，由於蘋果網站列明「每位顧客可以預訂最多 1 次。」因此 Apple ID 就變成蘋果驗證買家是否訂多過一次的最佳渠道。想訂多過一次，申請多幾個 Apple ID 就係常識。記住，申請 Apple ID 要用全名。
第四步：神速收發 SMS
輸入 Apple ID 之後要輸入網頁驗證碼，之後就要用手機向蘋果公司指定的電話號碼（6450 0366），發出指定的信息，以獲得預訂代碼。呢個位想快，都有好幾個貼士，第一係【用 MightyText app 以電腦收發 SMS】，另《豌豆莢》程式都設有 SMS 收發功能；第二個貼士係，輸入 SMS 代碼唔需要跟足大細階；第三招係先關閉手機的自動修正錯字功能，因為呢個功能會不斷將「無意思」的代碼自動修正，令你點打都錯；第四招係【買多幾張太空 SIM 卡】一齊發送 SMS。此外，有記者試過用同一張 SIM 卡多次向蘋果發送 SMS 以取得預訂代碼，卻收到「每部電話只可索取 5 個預訂代碼。」，但明明該 SIM 卡只曾索取 1 個預訂代碼呢！
第五步：選擇型號都要快
入到選擇型號畫面，代表你收到 SMS 預訂代碼。但唔好開心得太早，請從速選擇型號，根據呢幾天【討論區報價】，曾有型號跌穿 IPO，但收機價日日唔同，大家要小心「損手」。
第六步：個人資料都有得玩？
最後填寫個人資料，蘋果今次接受多種證件作登記，以本地人計可以用身份證、回鄉證及國際旅遊護照登記。有網民指出，如果你的證件號碼有「0」字，可以用英文字母「O」字嘗試輸入資料，避過電腦系統檢查重複號碼，舉例如下：
正確身份證號碼：A012345（0）
轉用英文字母代替「0」字：AO12345（O）
你可能會問，假設成功訂機，親身到門市取機，職員應該會當場檢查到號碼有錯！正確，這是很有機會發生的。而且蘋果公司早就寫明：「每位顧客可以預訂最多 1 次。如果 Apple 認為顧客提供了誤導或虛假資料，及/或濫用、干擾或者試圖繞過預訂系統，Apple 會保留拒絕、限制或取消預訂的權利。」炒機還炒機，大家要乖乖守規矩呀！最後，祝大家成功 iReserve。
Source：ezone.hk
Photo：經濟日報圖片庫
